Bíó og sjónvarp

Gísli Örn leikstýrir þriðju seríu hinna vinsælu Exit-þátta

Tryggvi Páll Tryggvason skrifar
Gísli Örn Garðarsson leikari og leikstjóri.
Gísli Örn Garðarsson leikari og leikstjóri. Vísir/Vilhelm

Gísli Örn Garðarsson mun leikstýra þriðju þáttaröð af norsku þáttunum Exit, sem notið hafa gríðarlegra vinsælda víða.

Gísli greindi frá þessu í viðtali í Bakaríinu á Bylgjunni í dag.

„Það er fullt framundan. Ég get nú kannski bara sagt frá því hérna að það stendur nú til að ég sé að fara að leikstýra norsku seríunni Exit, þáttaröð þrjú,“ sagði Gísli Örn.

Norsku þættirnir Exit, eða Útrás, segja frá fjórum vinum í fjármálalífinu í Noregi sem lifa hratt og siðblinda, ofbeldi, eiturlyf og gríðarlegt magn peninga kemur helst við sögu. Þættirnir hafa sem fyrr segir vakið mikla athygli.

„Ég þekki þá alla mjög vel sem búa það til. Alltaf verið með annan fótinn í Noregi að einhverju leyti,“ sagði Gísli Örn sem stigið hefur sín fyrstu skref sem leikstjóri í sjónvarpi með þáttunum Verbúðinni sem sýndir eru á Ríkissjónvarpinu, en þar leikstýrir hann ásamt Birni Hlyni Haraldssyni sex þáttum. 

Þættirnir hafa fengið afskaplega góðar viðtökur. Í Bakaríinu var Gísli Örn meðal annars spurður að því hvort að önnur þáttaröð af Verbúðinni væri möguleg. Svarið var ekki afdráttarlaust.

„Við þurfum bara að sjá til. Ekki endilega. Þessi sería stendur sér en lífið á Íslandi hélt áfram og þessir eintaklingar sem við erum að leika héldu alveg áfram að vera til í íslensku samfélagi,“ sagði Gísli Örn.

Hlusta má á viðtalið við Gísla í heild sinni hér að neðan. Þar var farið yfir víðan völl en Verbúðin var ofarlega á baugi.


Tengdar fréttir

Mikið sé gert úr því að lands­byggðar­fólk sé rolur og aular

Ásmundur Friðriksson, þingmaður Sjálfstæðisfólksins, segir mikið gert úr því í fjölmiðlum og íslenskum kvikmyndum að landsbyggðarfólk sé upp til hópa rolur og aular. Þar vísar hann helst til Verðbúðarinnar, nýrrar þáttaráðar RÚV, sem hann hefur gagnrýnt harðlega í dag.

Ver­búðin frum­sýnd við mikla lukku net­verja

Verbúðin, ný þáttaröð úr smiðju Vesturports, var frumsýnd á RÚV í kvöld. Fyrsti þáttur hefur fengið góðar viðtökur landsmanna, ef marka má viðbrögð á netinu. Netverjar virðast sérlega hrifnir af mikilli nekt sem birtist í sjónvarpi allra landsmanna.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.