Innherji

Agnar hættir hjá Kviku og skulda­bréfa­sjóðnum slitið

Þorsteinn Friðrik Halldórsson skrifar
Árleg ávöxtun sjóðsins frá stofnun hefur verið rúmlega 10 prósent. 
Árleg ávöxtun sjóðsins frá stofnun hefur verið rúmlega 10 prósent. 

Agnar Tómas Möller mun láta af störfum sem sjóðstjóri hjá Kviku eignastýringu samkvæmt heimildum Innherja. Í kjölfarið verður sérhæfða skuldabréfasjóðnum Kvika – Iceland Fixed Income Fund (IFIF) slitið og fjármunum skilað til hlutdeildarskírteinishafa.

Agnar hefur stýrt IFIF samfleytt frá stofnun sjóðsins árið 2009. Sjóðurinn var undir hatti fjármálafyrirtækisins GAMMA fram til ársins 2019, eða þangað til Kvika tók yfir reksturinn.

Árið 2021 var fyrsta árið frá stofnun sem IFIF skilaði neikvæðri afkomu. Gengið lækkaði um 6,3 prósent í fyrra og hefur lækkað enn frekar á þessu ári. Í árslok 2021 var stærð IFIF, sem hefur skilað rúmlega 10 prósenta árlegri ávöxtun frá stofnun, 14,3 milljarðar króna borið saman við rúmlega 18 milljarða í lok árs 2020.

Í fjárfestabréfi sem Agnar sendi sjóðsfélögum í byrjun þessa árs og Innherji greindi frá, kom fram að það hefðu verið „mikil vonbrigði að skila fjárfestum jafnslakri“ ávöxtun. Sjóðurinn hefði lagt upp með þá sýn í upphafi árs 2021 að atvinnuleysi, sem þá mældist um 11 prósent, myndi lækka hægt á sama tíma og verðbólga myndi ekki ná að rísa markvert í slíkum efnahagsbata.

„Það myndi leiða til óbreyttra vaxta Seðlabankans á árinu, sem þá voru 0,75 prósent, sem myndu taka að rísa hægt í fyrsta lagi árið 2022 – sem var í ágætu samræmi við þann tón lesa mátti frá Seðlabankanum á þeim tíma,“ ritaði Agnar.

Sú spá gekk ekki eftir. Viðspyrna efnahagslífsins reyndist mun kraftmeiri sem skilaði sér í háu atvinnustigi. Það, ásamt hækkandi verðbólgu og verðbólguvæntingum, setti af stað vaxtahækkunarferli Seðlabankans í fyrra sem hefur orsakað mikla hækkun nafnvaxta á skuldabréfamarkaði, einkum á styttri skuldabréfavöxtum.

„Þótt sjóðurinn hafi bæði haldið á stöðum í óverðtryggðum og verðtryggðum skuldabréfum, voru breytingar ekki gerðar í tíma þegar hin mikla og hraða hækkun vaxta og vaxtavæntinga fór af stað um miðjan október, bæði hér heima og erlendis, sem greiddi sjóðnum þungt högg,“ segir í fjárfestabréfinu.

Agnar mun samkvæmt heimildum hefja sagnfræðinám við Háskóla Íslands í haust en hann er nú þegar með B.Sc. gráðu í véla- og iðnaðarverkfræði og M.Sc. gráðu í iðnaðarverkfræði frá Háskóla Íslands.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.