Atvinnulíf

Hræðilega erfitt að lenda á milli tveggja yfirmanna

Rakel Sveinsdóttir skrifar
Það getur verið hræðilega erfið staða þegar að til dæmis forstjórinn baktalar yfirmanninn þinn eða öfugt eða forstjórinn biður þig um að fara á bakvið yfirmanninn þinn.
Það getur verið hræðilega erfið staða þegar að til dæmis forstjórinn baktalar yfirmanninn þinn eða öfugt eða forstjórinn biður þig um að fara á bakvið yfirmanninn þinn. Vísir/Getty

Auðvitað er það hið besta mál að vera í góðu sambandi við yfirmanninn sinn og síðan yfirmann yfirmannsins. En hvað er til ráða þegar þú lendir á milli þessara tveggja?

Við skulum í þessari umfjöllun kalla annan forstjórann en hinn yfirmanninn. Og þótt sumum finnist það hljóma skringilega að erfið staða geti komið upp hjá starfsfólki vegna þeirra, er staðreyndin sú að þetta er staða sem svo sannarlega getur komið upp.

Og á sér margar birtingamyndir.

TIl dæmis þegar forstjórinn baktalar yfirmanninn eða yfirmaðurinn forstjórann.

Eða forstjórinn biður þig um að gera eitthvað, án vitundar yfirmannsins. Eða öfugt.

Svo ekki sé talað um þegar forstjórinn trúir þér fyrir upplýsingum en tekur fram að yfirmaðurinn þinn eigi ekki að fá þessar upplýsingar. Eða öfugt.

Kannist þið við þetta?

Í umfjöllun Harvard Business Review líkir sérfræðingur sem rætt er við, þessari stöðu sambærilegri og þegar að börn lenda í því að vera á milli foreldra sinna þegar þau eru að rífast.

Þetta er staðan þar sem okkur svo sannarlega finnst við vera á milli steins og sleggju.

En hér eru nokkur ráð sem geta hjálpað.

#1. Þegar forstjórinn biður þig um eitthvað, án vitundar yfirmannsins

Þegar að þessi staða kemur upp er best að vera hreinskilin(n) strax. Þetta er erfið staða en þarna er hægt að milda aðstæður með því að benda forstjóranum á að þarna er verið að setja þig í erfiða stöðu.

Og þetta er erfið staða að vera í. En þér mun örugglega líða enn verr ef þú fylgir verkefninu eftir og ert þar með farinn að fara á bakvið yfirmanninn þinn. Betra er að benda forstjóranum á það strax í upphafi að þér finnist þetta óþægileg beiðni.

#2. Forstjórinn segir þér eitthvað sem yfirmaðurinn má ekki vita (eða öfugt)

Auðvitað getur þetta átt við eðlilegt trúnaðarsamband. Til dæmis ef viðkomandi er í spjalli að trúa þér fyrir því að þau hjónin eigi von á barni en það sé ekki orðið opinbert.

En þegar upplýsingarnar eru vinnutengdar er komin upp flókin staða. Því ef eitthvað fréttist, er í ofanálag mjög líklega hægt að rekja ,,lekann“ til þín.

Hérna er mælt með því að leggja áherslu á að hlusta vel og spyrja spurninga. Því oft enda rökræður með því að ákveðið er að upplýsingunum skuli deila með fleirum og/eða að það geti haft of neikvæðar afleiðingar ef málin eru ekki rædd meðal fleiri.

#3. Þegar forstjórinn og yfirmaðurinn eru að rífast/deila

Sú staða getur líka reynst starfsmönnum erfið þegar forstjórinn og yfirmaðurinn eru ekki á sama máli um eitthvað og þær deilur fara ekki framhjá neinum eða þér er trúað fyrir þeim.

Ef þú ert ein(n) í aðstæðunum er mælt með því að benda á hið augljósa: Menn séu greinilega ekki sammála, en mæla síðan með því að sérfundur verði haldinn um málefnið og fleiri dregnir að borði til að ræða málin.

Í alla staði er mælt með því að þú takir ekki afstöðu. Þótt þig langi til þess. Því í raun veistu aldrei hvernig það mál gæti endað fyrir þig.

Ef sú staða mögulega kemur upp að þú þarft að taka afstöðu, er að minnsta kosti mjög mikilvægt að þú takir þér þinn tíma í að velta fyrir þér hver sú afstaða er og hvaða afleiðingar sú afstaða gæti haft.

Eins er mikilvægt að þú standir á þínum mörkum þannig að sú staða komi aldrei upp að forstjórinn eða yfirmaðurinn fari yfir þau gildi sem þú sjálf(ur) hefur.


Tengdar fréttir

Um yfirmanninn sem truflar mann stöðugt

Það getur verið erfitt að eiga samstarfsfélaga sem trufla mann mikið við vinnu. En þegar það er yfirmaðurinn sem er stanslaust að trufla, geta málin virst nokkuð flóknari að takast á við. Því hvernig er hægt að biðja yfirmanninn um að hætta, eða draga úr því, að trufla svona mikið?

Helstu einkenni og afleiðingar óttastjórnunar á vinnustöðum

Ef skaðinn er skeður þarf að hreinsa til í stjórnendahópnum segir Bjarni Snæbjörn Jónsson í viðtali um óttastjórnun á vinnustöðum. Hann bendir hins vegar á að það er ekki alltaf svo að rót vandans liggi hjá stjórnanda.

Að forðast baktalið í vinnunni

Við tökum öll þátt í kjaftagangi einstaka sinnum. Heyrum einhverja djúsí kjaftasögu og berum hana á milli. Eða veltum okkur upp úr henni. Þetta er mannlegt og í raun þarf enginn að skammast sín því rannsóknir hafa sýnt að smá kjaftagangur er flestum eðlislægur. Þó ekki nema stundum í góðra vina hópi. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.